無能嘅人見得多，未見過好似港產官僚咁無能，連應唔應該為學校驗水咁簡單嘅事，都搞到方寸大亂，進退失據，甚至自打嘴巴，唔到你唔服。
係咁嘅，鉛水風波愈鬧愈大，接連有中小學證實中招，社會要求為學校驗水嘅呼聲此起彼落，點知港府一直闊佬懶理，關人個關。特別係教育局局長吳克儉，唔止堅拒為學校驗水，仲發表學校應該教導學生正確飲水態度及學生勿飲熱水等廢噏言論，簡直不知所謂。鑑於民怨愈來愈大，吳克儉日前終於知衰補鑊，聲稱唔反對學校驗水，開學日港府更加宣布優先為近千間幼稚園驗水，你話係咪自打嘴巴吖？
講起真係搞笑，為咗驗水問題，港府出爾反爾，今日嘅我打倒昨日嘅我，令人大開眼界。好彩今次只係驗水啫，如果係處理重大公共安全危機，以港府呢種進退失據嘅表現，隨時死得人多。教育界人士就批評得啱嘞，當局以為唔為學校驗水就唔會出洋相，但從未為學生健康着想，做法官僚兼卸膊，表現完全唔合格，如果當局一早宣布驗水，就唔使搞到家長同學生咁徬徨喇。係呢，家陣有家長要求為學生驗血，唔知港府會唔會又進退失據，方寸大亂呢？
所以話，古人真係講得無錯o架，德不稱其任，其禍必酷，能不稱其位，其殃必大。港產官僚無德無能，點可能唔出事吖。好似今次鉛水風波咁，本來只要盡快找出「鉛兇」，對症下藥，堵塞漏洞，就可以將危機化解於萌芽階段，可惜當局敷衍塞責，事件爆發至今超過兩個月嘞，連「禍鉛」出自邊度仲係矇查查，唔搞到天怒人怨至奇。一個負責任嘅政府可以將大事化小，小事化無，而港府次次拆彈都笨手笨腳，無事變有事，小事變大事，想唔認無能都唔得喇。港產官僚口口聲聲「適度有為」，點知連最基本嘅食水安全問題都搞唔掂，不如改為「適度無為」好過喇！
話時話，港府施政混亂，官僚遇事醜態百出，大家早就見怪不怪咯。吳克儉就係人辦喇，早年國民教育風波鬧到滿城風雨，佢救火變放火，解畫照本宣科固然表現無能，聲稱無上街反國教嘅市民係「沉默大多數」更加激起反彈，結果又係跪低收場。當然喇，吳克儉雖然語無倫次，但佢叫學生自求多福就冇講錯，面對呢班咁窩囊嘅官僚，學生想唔自求多福都唔得喇。
點講都好，鉛水問題影響市民健康，可大可小，當局再唔盡快拆彈，遲早火燒後欄，到時何止局長唔得掂，成個政府都唔得掂吖！