「家有一老，如有一寶」，講就係咁講，可惜港府刻薄成性，根本唔當老人家係寶，而係當草就真。呢，淨係安老政策咋，就搞到千瘡百孔，怨聲載道。
話說去年施政報告提出北上安老計劃，向深圳及肇慶兩間由香港機構營運嘅院舍買位，供輪候緊資助宿位嘅長者申請，基本費用由港府全包。聽落好似好吸引，點知推出後反應冷淡，表示有興趣嘅長者僅二百多人，而真正透過計劃北上安老嘅更只有七十三人咁大把，對比近三萬名輪候緊資助宿位嘅長者，連杯水車薪都不如。
點解反應咁差？好簡單，配套不足囉。雖然呢兩間院舍設備齊全，基本費用又全免，但淨係醫療呢一關已經令長者卻步。大家都知，長者體弱多病，經常要睇醫生，而內地醫療費用又高昂，質素又冇保證，老人家與其長途跋涉返港就醫，不如索性留喺香港好過。再講吖，好多長者喺內地無親無故，出起事上嚟隨時叫天不應叫地不聞，加上內地物價愈嚟愈貴，生活指數拍得住香港，對老人家又點會有吸引力吖。
正如深圳院舍負責人話齋，北上安老嘅原意唔係唔好，但港府只係畀多個選擇，之後就關人個關，配套設施天殘地缺，又點樣鼓勵長者北上安老呢？佢建議港府將外展醫療引入內地院舍，由醫管局派醫生北上睇症，化繁為簡，效果應該好好多喎。
建議的確唔錯嘅，問題係港府肯唔肯聽呢？莫講話醫管局人手不足，就算人手充足，當局一樣闊佬懶理嘅咋。大家有眼見，港府口口聲聲敬老護老，但從資助宿位長期嚴重短缺就知，所謂敬老護老純屬敷衍民意。遠嘅唔講，淨係早前發生嘅私營護老院虐老醜聞，就知港府幾咁不負責任，明知私營院舍質素良莠不齊，依然放任自流，不監不管，到底有冇誠意搞好安老服務，唔使問都知喇。
講起都幾可悲，長者辛勞大半生，到頭來被政府視為包袱，唔係叫人居家安老，就係叫人北上安老，推得就推，卸得就卸。香港係富裕社會，港府坐擁金山銀山，竟然任由每年數千名長者喺輪候資助宿位期間含恨而終，唔少基層長者仲要靠執紙皮維生，簡直係恥辱。
講到底，為長者折枝，非不能也，實不為也。只要港府肯覓地興建大型資助安老院舍，就可以解決唔少安老問題，家陣連發展商都肯捐地興建安老院，偏偏港府唔嗲唔吊，一味小修小補，呢啲唔係涼薄又係乜吖！