中環出更：大舊選擇性撐政府申撥
泛民主派操控嘅立法會工務小組委員會近期火速審議政府撥款申請，繼上星期順利通過六項撥款申請，尋日亦通過多三項撥款，當中包括水務署新界西辦事處搬遷至天水圍。唔單止咁，經常同政府唱反調嘅人民力量陳偉業（大舊），仲罕有表態支持政府將旺角水務署遷至天水圍，話有助天水圍擺脫悲情城市嘅形象喎。咁支持，莫非同佢所屬嘅新界西選區有關？
水署新西辦事處遷天水圍
政府向工務小組申請八億二千多萬元撥款，用來將旺角洗衣街水務署新界西辦事處及水資源教育中心，遷至天水圍天祥路與天柏路交界嘅一幅土地，並興建一座新大樓。雖然議員葉國謙支持上述項目，但認為天水圍位置偏遠，交通同旺角有啲差距，呢句說話隨即引來大舊不滿。
大舊話，一向鼓勵政府將辦事處搬到天水圍，希望藉此改變天水圍悲情城市嘅觀念，批評葉國謙嘅講法正正反映主流權貴對該區嘅形象，所以要加以糾正及譴責。佢又話，由荃灣經大欖隧道入去天水圍只需十五分鐘，所以交通方便，批評葉嘅講法好明顯係唔熟識香港嘅地理環境。
卓妮