政情：美食車甩轆 港府搵嚟搞

議員憂胎死腹中

推行美食車吸引遊客、振興本土經濟，原本係旅遊業界引頸以待嘅建議，可惜只聞樓梯響。旅遊界議員姚思榮尋日就喺立法會提出質詢，問當局有關經營美食車牌照嘅問題，以及美食車幾時先可以真正喺香港推出。不過，當局始終都冇提供一個確切嘅時間表。

高佬賢喺會上亦暗批鬍鬚曾同負責推行美食車嘅商經局局長蘇錦樑，佢引述商經局早前話因為香港未有適用於美食車牌照制度，所以或要以固定食物製造廠牌照嘅規定去經營。高佬賢就發晒火話，如果要令流動嘅美食車變成唔流動嘅美食車，咁點解仲要搞美食車呢？仲質問當局喺牌照上究竟有咩方向，唔想美食車計劃胎死腹中。

商經局「跟進緊」

已經就美食車問題多次質詢政府嘅工聯會陳婉嫻亦批評政府政策混亂，又話之前喺深水埗桂林夜市都有唔少小食車擺賣，可以話係香港嘅美食車，但係當局就要趕盡殺絕，先搞到依家咁唔三唔四喎。

高永文就回應話，桂林夜市嘅車仔檔大部分都係無牌經營，而且影響公眾衞生，對街坊亦造成滋擾，故此呢類無牌小販一定要取締。佢強調，就算引入美食車都唔可以影響食物安全同環境衞生。至於商經局又點回應呢？因為蘇錦樑又外訪，代為上陣嘅副局長梁敬國亦只能夠不斷話當局跟進緊；又話香港人口密集、道路擠迫，所以都要考慮呢啲因素喎。鬍鬚曾未經過深思熟慮就隨口噏話引入美食車，真係難為下面班官員。