中環出更：鍾志平想周三列公眾假
香港喺全球快樂報告中嘅排名好低，同港人工作壓力大不無關係。由香港提升快樂指數基金（下稱基金）及生產力促進局合作推出嘅「開心工作間」推廣計劃，尋日舉行頒發標誌典禮。生產力促進局主席陳鎮仁話，大家都以為周一係每星期之中最唔開心嘅日子，但外國有調查顯示係周三至啱，事關周三距離上一個及下一個周末最遠喎。
基金副主席鍾志平（Roy）聞言即搞笑話，既然打工仔咁唔開心，不如將周三定為公眾假期，咁就變成一星期中最開心嘅日子喇！阿Roy一向鍾意講笑，所以坐喺台下嘅勞工及福利局副局長蕭偉強都笑完就算。
新沙士勢兇 名人怕遊韓
蕭偉強致詞時仲賣口乖話，勞福局局長張建宗（小肥張）因要到立法會而未能出席，相信小肥張會享受出席典禮多過坐喺立法會喎！
出席活動嘅仲有基金主席吳宏斌、會長陳國民、副主席楊志雄、榮譽會長史立德及陳明耀等人。講到韓國爆發新沙士疫情愈趨嚴重，個個都話暫時唔會去韓國玩。
史立德話，去年佢同太太去過韓國兩次，對當地嘅創意文化印象唔錯，原本今年計劃再去，但依家都要取消行程。吳宏斌就連長途機都唔搭住，事關機艙內空氣循環唔好，幾百人長時間困住艙內，受感染嘅機會大好多。
佢哋亦好關心政改能否通過，成班吹水老友已經開咗賭盤，暫時係一賠二，賭會通過嘅人少。陳國民話，雖然大家認為被否決機會大，但心中都想通過，所以到時就算輸咗請食飯，仲更加開心。
卓妮