禽流感驚魂不斷，唔止搞到「雞靈塗炭」，業界同政府仲為咗活雞分流而鬧得不可開交添。可能雙方都知農曆新年就快到啩，再拗落去只會兩敗俱傷，終於達成「車過車」分流方案，活雞有限度恢復供應，總算皆大歡喜喇。
黑狗偷食，白狗當災，香港幾乎每年都爆發禽流感，而且每次都係內地雞出事，本地雞陪葬，業界條氣點會順吖。唔係咩，業界早就要求當局分開處理中港活雞，可惜官老爺當作耳邊風，咪種下今日嘅禍根咯。今次話就話首次啟用打鼓嶺活雞分流站，但因為同當地村民溝通不足，加上「唔准落地」、「原車運雞」等措施，令業界運輸成本暴增，結果又係添煩添亂，差啲搞到「活雞佔領」咁滯。
嗱，雖然雙方暫時傾掂數，但禽流感嘅根本問題未解決，學似食衞局局長高永文話齋，一日有活雞供應，禽流感嘅威脅只會驅之不散。仲有呀，物以稀為貴，由於暫時係有限度恢復供應活雞，目前只得四成雞檔有雞賣，搞到零售價攀升，兩張紅衫魚都未必買到一隻雞，萬一內地雞喺月底無法恢復入口，雞價一直貴到農曆新年都似。
聽吓市民點講啦。「東方報業民意調查」顯示，對於本港長期受到內地活雞禽流感威脅，三成九受訪者批評當局未做好兩地家禽分流所致；三成三認為應減少輸入內地活雞，維持本地活雞；一成三直斥連累本港殺雞頻頻。至於打鼓嶺活雞分流站引起連串爭議，三成三批評分流站措施及準備不足；兩成五認為成本增加，市民要捱貴雞；一成六直斥當局閉門造車，添煩添亂。
冇錯嘞，一味殺雞只係斬腳趾避沙蟲，根本唔係辦法。其實，要一勞永逸解決問題，辦法唔係冇嘅，一係將中港活雞分家，一係禁止活雞供應。問題係港府出名弱勢兼無能，尤其係家陣社會泛政治化，淨係打鼓嶺分流站都搞到是非不斷，仲要搵地方整多個家禽批發市場，真係唔使旨意。再講吖，市民飲食習慣根深柢固，一時三刻難以改變，何況要擺平雞農、欄商及雞販嘅利益，談何容易吖。
講到底，禽流感雖然可怕，但最得人驚係「官流感」，即係懶理市民同業界死活嘅官僚作風。前朝食衞局廢官周一嶽曾實牙實齒話要搞中央屠宰，仲威逼利誘雞販交出牌照添，結果全部大隻講，遺禍至今。點都好喇，只要精神不滑坡，辦法總比困難多，港府有責任撥亂反正o架。正如逾半受訪者話齋，當局係時候攞出決心研究根本解決之道，咪任由禽流感周而復始威脅市民吖！