奧運金牌得主李麗珊有句名言︰「香港運動員唔係垃圾。」冇錯嘞，港產運動員喺國際賽事屢獲殊榮，梗係唔係垃圾喇，不過咁，港產官僚就唔同喇，話就話推廣體育，但做嘢甩甩漏漏，笑話多多，直頭係垃圾中嘅垃圾。
係咁嘅。為提升單車運動員水平同埋推廣單車運動，港府耗資超過十一億元，喺將軍澳興建咗一座有世界級單車賽道嘅單車館，舊年四月底至開張，點知十一月就因為賽道木板不平，要封館三個月進行「優化工程」。唔使問阿貴，大拿拿四百二十萬元嘅工程費用，當然又係納稅人埋單，加上工程期間其他體育設施暫停使用，場租又唔見三十幾萬。有立法會議員就講得啱嘞，如果當局做好驗收工作，就唔會搞成咁。
話時話，單車館啟用不足一年，保養期仲未過，工程費唔係應該由承建商負責嘅咩？
即係咁，發展單車運動無可厚非，問題係專業運動員始終係少數，唔係個個都係黃金寶或者李慧詩，如果普羅大眾享用唔到設施，當局係咪應該檢討吓資源點分配呢？呢嗱，單車館啟用以嚟累計開放約三千小時，只有五百多小時有人使用，你話係咪浪費資源吖？鬼咩，普通市民根本用唔到專業嘅單車賽道，有咩法子唔長期養蚊吖。
好嘞，專業單車道市民就話用唔到啫，單車館對出嘅公園佔地超過五公頃，草坪、人工湖、兒童遊樂場一應俱全，一家大細單車遊總可以喇啩？唔好意思，原來場內嚴禁踩單車喎，問你服未。
咁就好笑嘞，單車館公園居然唔准踩單車，正如泳池唔准游水咁，仲有冇再荒謬啲呀。大拿拿十幾億元嘅工程，甩皮甩骨唔在講，市民更加得物無所用，淪為大白象，你話納稅人係咪冤過竇娥吖？
講起大白象工程，其實單車館只係小兒科咋。今時今日基建工程，唔係延誤超支就係溶溶爛爛，好似造價達八十億元嘅啟德郵輪碼頭咁吖，啟用以來醜聞多多，蝦碌不斷，每次打風例牌淪為澤國，配套設施到依家仲係天殘地缺。仲有西九文化區，洗濕咗個頭騎虎難下，最後仲分分鐘爛尾收場，市民都唔知搵邊個算帳。
港產官僚大事做唔到，小事做唔好，連興建單車館都搞出個大頭佛，真係唔到你唔服。功夫茶有個建議，反正丟空，不如物盡其用，畀班官僚一顯身手，喺鑊形單車道鍊番轉好過啦！