想過白色聖誕，又唔想搭飛機出遠門，有乜辦法呢？有人諗到用發泡膠粒同棉絮鋪地，營造白雪紛飛嘅效果，係就係夠晒創意，可惜吖，假雪既難清理又唔環保，咁樣嘅「白色聖誕」不要也罷。
係咁嘅，呢一幕「白色聖誕」奇景發生喺尖沙咀，寶勒巷一間酒吧喺行人路同坑渠蓋鋪滿假雪，面積大約一百平方呎，吸引唔少市民欣賞；隔籬赫德道一間酒吧仲誇張，唔止製造大量假雪，有人仲將假雪帶走，沿途灑雪，將成條街道「漂白」不特止，連附近嘅加拿分道、金馬倫道等亦受到波及，變成白茫茫一片，問你怕未。
嗱，玩雪就話過癮啫，不過執手尾嘅清潔工人就慘咯。有工友大吐苦水，近年上址酒吧每逢聖誕必玩假雪，玩足幾日，掃足幾日，一直玩到新年。最攞命嘅係，呢啲發泡膠粒好難清理，撞正風大更加飄到四圍都係。有附近商戶更加叫苦連天，指受假雪問題困擾至少三年，一直投訴無門。
咁都未算呀，假雪唔止好難清理，仲損害環保添。正如環保團體話齋，本港大部分雨水渠都係直駁大海，垃圾唔會經過濾水廠處理，即係話製造假雪嘅發泡膠粒同棉絮好可能直接沖出大海，影響生態。係人都知，發泡膠又名「生態殺手」，要幾百年至可以分解，有研究更顯示，喺海洋漂浮嘅發泡膠如果被魚類或海龜吞食，可能阻塞消化系統，甚至導致死亡。一句講晒，玩假雪唔單止累街坊，直頭係累地球添吖。
話時話，今時今日消費主義大行其道，每逢大時大節，商家例必巧立名目，發明各種「應節」物品，結果製造大量垃圾，地球先生認真多得佢哋唔少。嗱，就講每年中秋節吖，玩吓燈籠賞吓月咪得囉，唔少人係都要玩螢光棒，正一阿茂整餅，冇嗰樣整嗰樣。大家都知啦，製作螢光棒嘅化學物質同發泡膠一樣，都係好難分解嘅，有團體估計本港一年有超過一億支螢光棒直接送入堆填區，你話係咪環保大災難吖。
講到堆填區，又係一個大問題，睇見就嚟滿瀉，垃圾圍城危機迫在眉睫，偏偏三堆一爐爭議多多，受阻於立法會，寸步難行，大家繼續係咁製造垃圾，香港想唔變臭港都幾難。
講真吖，要過一個既有氣氛又有意義嘅聖誕，其實唔一定要玩假雪嘅啫，最緊要唔好浪費資源，更加唔好破壞環保，否則，幾有氣氛都係假。