農曆新年就快到，又係時候洗邋遢。不過咁，潮流興環保，家陣垃圾圍城危機迫在眉睫，洗邋遢還洗邋遢，千祈唔好再增加堆填區壓力吖。
呢嗱，如果你居住沙田，咁就好辦嘞。事關全港首個社區環保站農曆新年前將會喺該區啟用，市民可以將唔需要嘅物品送去回收，嚟一次綠色大掃除。講番呢個環保站，佔地一萬六千呎，由環保署斥資二千萬元興建，屬於「綠在區區」頭炮，非牟利團體負責日常營運，初期會先試收幾類物品。
變廢為寶，物盡其用，聽落的確唔錯嘅，但成效係點，仲要睇過至知。嗱，地區人士同業界就唔係咁樂觀嘞。有區議員擔心環保站可能引發氣味問題，對居民造成滋擾；有回收業人士就認為，社企回收實戰經驗不足，擔心環保站同佢哋搶飯碗喎。
講真，呢啲質疑唔係無的放矢o架。之前港府亦試過資助社企喺屯門搞塑膠資源再生中心，原本諗住將塑膠回收並轉化為可銷售嘅高增值再生物料，減輕堆填區負荷，點知最終搵唔到人接收，搞到堆積如山，成個足球場咁大。當時業界已經提醒，非牟利機構即使有回收經驗，但多數規模較細，相反回收商有穩定合作夥伴同渠道，收番嚟嘅物料唔愁冇出路，如果兩者攜手合作，優勢互補，效果就唔同喇。
冇錯嘞，要做好廢物回收，當局除咗出錢之外，監察同協調同樣重要，私人回收商嘅參與更加不可缺少，否則，浪費公帑唔在講，仲隨時弄巧反拙，傳播惡菌，盞唔衰攞嚟衰嘅咋。
話時話，環保官僚推動源頭減廢多年，不嬲都係眼高手低，講多過做。好似廚餘咁吖，佔本港家居垃圾四成，亦係都市固體廢物嘅最大類別，但回收率長期停留喺個位數，絕大部分就咁送去堆填區就算。反觀南韓，十年前已經立法禁止將廚餘送往堆填區，回收嘅廚餘幾乎全部用嚟生產堆肥、飼料同再生能源。就講鄰近嘅台灣吖，廚餘回收率都超過四成。難為香港成日自詡國際城市，淨係環保已經輸人九條街，你話羞唔羞家。港產官僚冇做好自己份工，又點叫市民為環保作出犧牲吖？
無論點都好，保護環境，人人有責。環保站作為一種新嘗試，無疑值得支持，最緊要係做得好好睇睇，有始有終，如果又係甩甩漏漏，有頭冇尾，盞添煩添亂咋！