潮流時興講集體回憶，香港「廉政之都」呢塊金字招牌，睇怕唔掛得幾耐咯。呢，著名反貪組織「透明國際」前排公布今年度「清廉指數」，本港排名及得分雙雙急挫，全球排第十七，同排名第七嘅老對手新加坡差距愈拉愈闊，得分係回歸以來第二低。咁跌法，廉署形象遲早一鋪清袋嘅咋。
反貪成績單咁難睇，市民預咗喇。嗱，前特首曾蔭權爵士任內，本港廉潔排名不斷下挫，佢任期最後一年更爆出連串醜聞，「貪遍省港澳，歎盡海陸空」點止唱到街知巷聞吖，直情「揚威」國際喇。香港出咗咁大隻蒼蠅，廉署調查至今就快三年，竟然仲係泥牛入海無消息。仲有，前廉政專員湯顯明「茅台換政協」，廉署個朵畀佢搞到臭晒，但有關調查又係冇晒聲氣。有人話廉署之劍生晒銹，唔係冇理由。
一件污，兩件穢。早排壹傳媒老闆淫賤黎被揭過去兩年用四千萬黑金收買泛民政客，啲政客呢頭靜雞雞收埋冇申報，嗰頭就幫壹淫媒出聲，明顯有行賄收賄嘅嫌疑，但廉署一樣查無下文，好似驚咗佢哋咁。你話嘞，小市民犯法要拉要鎖，政客同淫媒大亨犯法就網開一面，廉潔指數有乜辦法唔跌跌不休吖。
嗱，對於本港廉潔排名同得分雙雙下跌，「東方報業民意調查」結果顯示，四成二受訪者話感到腐敗之風蔓延；兩成半形容本港廉潔程度拾級而下。對於貪曾、貪湯案件未有檢控，四成三受訪者直斥調查虎頭蛇尾，擔心不了了之；兩成四指未能彰顯法治精神。
再講政治黑金呢單畸士，唔止淫賤黎直認不諱，連唔少涉事政客都承認袋住先、未申報，廉署搞咗一大輪仲唔拉人封艇，點講都失威啦。民調又顯示，近四成受訪者炮轟當局執法冇信心、冇魄力；更有三成人直指咁做係變相縱容黑金政治。
廉署辦案懶懶閒咯喎，政客有恃無恐，仲唔變本加厲咩。呢，政客被踢爆涉嫌利益衝突，立法會冇亡羊補牢不特止，仲通過放寬議員申報利益標準，而且係建制派同反對派一致通過添。洪洞縣裏無好人，立法會又點會例外吖，四成八受訪者直指無法有效監管議員；近三成狠批議員寬己嚴人，雙重標準。
真係諗極都唔明，家陣中央打老虎不亦樂乎，連前政治局常委同前軍委副主席都淪為階下囚，老百姓拍晒手掌，香港啲貪官同政客不過係蒼蠅咋，廉署咁都唔敢打，你話嘞，廉政招牌係咪拆得吖。
功夫茶都係嗰句，絕代雙貪一日逍遙法外，淫賤黎呢班牛鬼蛇神一日唔法辦，香港廉政排名只會不斷插水嘅咋。