政情：明復會 建制派驚「佔」

叫警察開路 要小巴接送

無論係免費電視發牌風波或反對新界東北工程前期撥款，班建制派議員都只係諗定點樣離開立法會，但今次就唔係咁簡單，因為立法會外圍仍然被示威者佔領，所以未諗離開前，就先要諗吓點樣入到立法會開會。據聞尋日行管會開會，建制派拋出嘅建議真係五花八門，有人就建議秘書處要安排一架中型小巴去港九四處接班議員開會，然後去到最近立法會嘅地方落車，等佢哋步行入立法會。

呢條橋真係唔知邊個諗出嚟，大家可以幻想吓，如果佔領區突然出現一架小巴，十幾廿個建制派議員眾目睽睽下經過路障行入立法會，你估會發生咩情況呢？所以聽聞有部分建制派議員唔打算坐小巴，寧願自己一支公大搖大擺行去立法會，反而無咁覺眼。更有議員話，如果遇到佔領示威者包圍，甚至被襲擊，可以等人知道佔領行動嘅暴力同唔講道理喎。

有口痕友就爆料，話一班自由黨同經民聯嘅功能界別議員，其實好擔心成為集會人士狙擊目標，所以希望警方在立法會附近戒備，一有咩事就可以衝入立法會保護佢哋。唔好以為得商界政黨會咁騰雞，有民建聯議員就擔心在立法會「屈蛇」嘅示威者「裏應外合」，希望引用消防條例，限制立會大樓每層人數不可超過一百人，諗住咁樣就避免到太多示威者「訪客」。

周四答問大會恐凍過水

立法會主席曾鈺成尋日就宣布，周三大會公眾席只容許十人旁聽，並實施黃色及紅色警示制度，黃色警示包括授權秘書長召喚警方到大樓內候命，而紅色警示則包括暫停會議、撤離大樓使用者及要求警方採取行動，而各黨派必須在今日前提交明日嘅訪客數目。

至於周四係咪繼續舉行答問大會就仍有隱憂。雖然曾鈺成話應該會如期舉行，點知特首辦就話，特首當日係咪出席答問大會，要視乎當日有冇不受干擾通道，目前為止未見有適當安排確保官員出入平安。不過，秘書處昨晚同特首辦始終傾唔掂點樣安全送特首進出立法會，皆因車道及行人路皆不通、保安員未有足夠信心保護特首、召喚警方進場協助或會惹爭議。照咁睇，周四答問大會似乎都係凍過水。