中環出更：潘宗光信佛 自爆曾經好執着
每個人隨着年紀同際遇，對於處事都有轉變，宗教信仰往往就係令人轉變嘅其中一個因素。理工大學前校長潘宗光日前出席一個首演禮，就自爆自己做校長時，諗新政策都試過好執着咁喺主觀嘅角度出發，其實老師同學生都未必認同，後來信咗佛教就改變咗好多喎！
潘宗光話，成為佛教徒後，每次同副校長一齊制訂新政策時，都會安排老師同學生做代表，預先諮詢呢兩方面嘅意見，綜合意見後，就重新包裝再推出，等大家易啲接受，更令師生都覺得校方尊重佢哋，達致雙贏局面。潘宗光覺得自己信佛後，成個人諗嘢都冇咁執着同主觀，識得放開啲咁去睇。
參加佛堂活動 董吳玲玲享受寧靜
其實今次呢個名叫《恆河經變》嘅首演禮，係由香港佛教「此岸－彼岸」弘法會主辦，善德基金會支持嘅，基金會主席董吳玲玲都有出席，佢講起屋企人都係佛教徒，間唔中會參加佛堂活動，享受寧靜嘅一刻，畀自己抽離吓，「靜一靜，停一停」，之後再衝刺，心情自然都會好啲，尤其現時香港社會動盪，佛教嘅正念思維有助於大家擺脫煩惱，回歸心靈平靜，建議大家盡量同身邊朋友放多啲正能量，「唔好煩，唔好躁」咁話。
同場仲見到珠海學院校長李焯芬，講起佛教，佢話從佛學角度嚟講，凡事都同因果拉上關係，例如當一個人嘅工作太忙碌，休息時間唔夠，可能就會病，所以每件事發生後，都要了解當中嘅原因，然後再諗解決方法，個人就會冇咁緊張。佢又話，睇番歷史，每當有大事發生時，好多人都會好重視，但事情一定會過去，可以樂觀啲咁去睇。
卓妮