中環出更：阿人「袋住先」 隨時有着數
多名被揭發收取壹傳媒黎智英巨額捐款嘅泛民議員，聲稱只係代所屬政黨同團體收錢，其中工黨主席李卓人（阿人）更被揭將部分捐款「袋住先」、袋足九個月先轉帳畀工黨，不過佢仍然死撐有關做法不涉個人利益，毋須向立法會公開申報。有心水清嘅市民就踢爆，泛民議員將政黨捐款「袋住先」，其實可為自己帶嚟好多着數，如可觀嘅利息收入、銀行對大額存戶嘅各種優惠等，涉及直接金錢利益，唔申報或遲申報絕對係違法違規！
存銀行賺息 享大額戶優惠
有讀者向本報指出，雖然依家港元存款利息偏低，但以阿人「私吞」肥佬黎五十萬元捐款長達九個月計算，放喺自己銀行戶口做定期，仍可賺數千至最多接近一萬元嘅利息收入。若阿人投資有道，喺去年十月收到該筆捐款後，趁低位用晒嚟買跟隨恒指升跌嘅盈富基金，到近日東窗事發後先至沽出，唔計紅利、單計基金價格升幅亦高達一成，帳面獲利高達五萬元，都咪話唔和味。
另一位讀者就專登搜尋咗本港多間銀行對大額存戶提供嘅種種優惠，包括送禮品、送積分、現金回贈、免批低息貸款、以至去銀行辦手續可「打尖」排快隊等，質疑泛民議員可利用將巨額捐款「袋住先」嘅機會，由普通銀行存戶變身大額存戶，將有關優惠「袋埋落袋」。
卓妮