中環出更：再踏深水埗 長毛憶亡母
有文化團體尋日喺深水埗通州街，搞咗個回憶深水埗舊貌嘅藝術展，搵到立法會議員「長毛」梁國雄、香港當代文化中心總監黃英琦（Ada）同多名本地藝術家出席開幕禮。期間長毛睹物思人，憶起當年與亡母嘅生活點滴，佢仲自爆因媽媽嘅關係，細細個已成日同啲鬼妹仔玩埋一堆，長大後更結識咗一位愛爾蘭裔女友添！
展覽原意係叫政府重建時要保留舊區建築物同特色，但長毛就唱反調話，自己對死物冇乜興趣，好似有人問佢會否懷念母校，佢就話唔會，但就會掛住班舊同學。佢坦言香港地少人多，啲屋賣得就賣，土地收得就收，所以市建局同大財團做生意搞重建，佢都冇計咁話。
重提與愛爾蘭女友舊事
至於深水埗區令佢最難忘嘅，就係佢同亡母嘅生活點滴，長毛透露佢媽媽以前喺深水埗兵房幫外籍人士打住家工，不時會湊住啲鬼妹、鬼仔落北河街玩，佢想多啲見到媽媽，就要自己去深水埗搵佢，順便同佢媽媽湊住嘅鬼妹仔玩。
長毛之後又提到同深水埗冇乜關係嘅愛爾蘭女友，佢哋喺英國認識，有一日女友突然叫佢着得靚啲，原來係帶佢去睇社區戲劇（Community Play），令佢得知英國政府會專登撥款畀當地嘅愛爾蘭人，舉辦一啲有家鄉色彩嘅活動，特區政府都好應該效法。
喺出任灣仔區議會主席時處理過多項灣仔舊區重建項目嘅Ada，強調每區嘅重建方式不同，但無論如何，都要維持番該區居民嘅原有生活模式，重建過程必須由下而上，例如深水埗有較多基層市民居住，未來就唔應該起太多大型商場，否則該區居民就好難享用到較便宜服務。
八旬畫家嘆社區變冷漠
年屆八十三歲嘅本地畫家歐陽乃霑（霑叔），自五二年開始就喺深水埗尋找寫生題材。佢話以前嘅深水埗區充滿人情味，不論佢企喺度、坐喺度、又或者走入果欄寫生，都會有街坊同佢傾偈，相比依家該區愈嚟愈多高廈，社會逐漸冷漠，令佢感到好悲哀。
卓妮