政情：公民講場：申報收錢唔係大晒

政治獻金醜聞曝光個多星期後，公眾焦點放咗喺五名涉嫌收受壹傳媒黎智英巨額捐款嘅泛民現任議員，有冇依例向立法會申報利益。不過，立法會前秘書長吳文華尋日就喺電台表示，有冇申報利益只係一個程序問題，最重要係當中是否涉及利益衝突，強調議員喺收受任何利益前，都要諗清楚會否影響自己喺議會嘅工作，唔係有申報就一定冇問題。事實上，多名泛民議員一收完肥佬黎錢，轉個頭就喺立法會公開為壹傳媒講好話，即使佢哋有喺事前同即場主動申報利益，呢啲咁明買明賣、姑息養奸嘅行為，依然係極唔要得！