政情：卿姐 阿基懷念「激進」時
立法會近年愈變愈激，每逢特首等高官到場，班激進泛民議員就會亂咁掟嘢，香蕉、毛公仔、陰司紙、玻璃杯等，應有盡有。兩名資深泛民議員劉慧卿（卿姐）同馮檢基（阿基）尋日出席一個有關「政治禮儀」嘅論壇時，就齊齊懷念過去未有掟嘢的日子。卿姐話自己以前都過激過，包括好似依家啲佔中示威者咁瞓街抗議。阿基更自稱自己係首個打破傳統、帶埋示威道具去前立法局開會嘅議員。然而近年香港政局嘅發展係沒有最激，只有更激，兩名當年被視為好激嘅議員，依家都異口同聲話反對議會暴力，慨嘆傳媒掛住報道啲掟嘢場面。唔知佢哋係真心反粗口、反暴力，定係眼紅人哋搶晒佢哋風頭呢﹖
爆粗掟嘢成風 劉感可惜
「尤德學者協會」尋日舉行論壇討論香港現時嘅政治氣候同政治禮儀，卿姐同阿基都有應邀出席。卿姐強調自佢九一年首次進身立法局至今，佢本人都一直冇變過，繼續咁直率同敢言，但環繞佢身邊嘅議員嘅衣着、談吐，以至開會嘅禮貌同程序，就不斷係咁轉變，由最初偶爾掟吓蕉、爆吓一兩句諧音粗口，到依家爆粗掟嘢已變成規範咁，真係感到好可惜。
阿基就憶述，喺八、九十年代，佢絕對喺社會上最激進嘅一員，例如當年立法局個個男議員都打呔着西裝，佢就唔肯跟隨，但係都做唔到好似依家啲激進派咁，着住條短褲去開會。
馮帶道具開會「創先河」
講到開會時展示示威標語及道具，阿基更自言係由佢創先河，當年佢帶咗把「尚方寶劍」道具入會議廳，時任立法局主席嘅施偉賢立即拉佢入房「訓話」。講到佔領行動，佢任職社區組織協會時，原來亦試過「佔領房署」抗議，喺當時嚟講算係好激。
講到點解議會愈嚟愈激，阿基就歸咎於立法會嘅選舉制度，又埋怨傳媒只顧報道啲激進場面，佢發言講到口水都乾埋，傳媒最多都報得嗰兩句，反觀有人掟嘢就可以出到張大相。卿姐就認為係因為政府表現差、民怨爆錶所致，市民覺得溫和泛民議員喺議會做唔到啲乜，所以把心一橫選出更激進嘅議員入去攪亂檔，幫自己消消氣。但兩人最後都認為單靠激進行為未必逼到政府就範，甚至會產生反效果喎。