「民主阿婆」前政務司司長陳方安生同「李漢奸」民主黨創黨主席李柱銘，早前出訪美國和加拿大展開「唱衰香港」之旅，期間叩見美國副總統拜登，對香港政改指指點點，備受各界抨擊。繼內地多個媒體猛烈批評後，尋日再有內地官方媒體狠批民主阿婆同李漢奸不甘寂寞、 顛倒是非、惡意抹黑，「盡顯搖尾乞憐、奴顏婢膝的醜態」。當一啲不明事理嘅外國政要敷衍幾句，兩人就如獲至寶、手舞足蹈，係「活脫脫一副『洋奴』、『漢奸』的嘴臉」。
內地官媒尋日發表評論文章，話民主阿婆同李漢奸成日都話要爭取民主，但佢哋喺港英時期分別任職布政司及立法局議員嗰陣，又唔見佢哋向英國為香港人爭取民主，讓國際社會向英國施壓。依家香港回歸，港人治港，佢哋先至出來話要爭取民主，仲要去到美國、加拿大尋求所謂嘅「國際社會支持」。
文章又質疑兩人，係咪請外國政府介入香港選舉、讓外部勢力挑選其認可嘅代理人來管治香港，係咪就叫「真民主、真普選」呢？如果連主權都不要嘅人，點樣講維護民權？並強調嗰啲企圖挾洋自重製造事端嘅人係不得人心嘅。