盛事基金醜事一籮籮！審計署日前炮轟盛事基金多年來成效不彰、撥款混亂、有篤數之嫌。立法會政府帳目委員會（帳委會）已決定要調查佢哋呢筆糊塗帳，屆時基金評審委員會主席林健鋒（Jeffrey）及獲基金資助嘅香港龍獅節活動召集人陳鑑林（橄欖）都好大機會被傳召。不過，同佢哋分屬黨友嘅帳委會主席石禮謙（大舊石）及委員陳克勤就講明唔會避席喎，咁咪自己人查自己人？
有帳委會委員話，同Jeffrey同屬經民聯嘅大舊石與同橄欖同屬民建聯（民記）嘅克勤應該避席，否則會令人覺得有角色衝突。克勤話，橄欖同民記喺事件上都冇金錢利益，所以唔覺得有需要避席。而大舊石就話，聆訊係公開嘅，咩都係喺陽光下進行。不過，有帳委會中人就透露，帳委會本周三開閉門會議時，克勤疑似率先為盛事基金講好話，話審計署批評啲「盛事」年年都係嗰幾味，但克勤就反駁話：「係盛事先年年搞，唔通龍舟扒一年唔扒一年咩！」
帳委會五月五日會先舉行兩場公開聆訊，首先處理咗房屋規劃重建同社企發展兩個項目，至於盛事基金就未知幾時舉行聆訊。有消息就話，大舊石身體有啲問題，五月要做手術，最少要抖一、兩個星期。至於係咩手術，大舊石就話私人事唔講咁多喎。