奇利湯臣寸格芬愛插水

NBA季後賽香港時間周日凌晨Tip off,快艇對勇士未開賽已火藥味濃厚,勇士射手奇利湯臣(Klay Thompson)於電台節目炮轟快艇大前鋒格芬(Blake Griffin)身形彪悍但喜愛「插水」,但後者早前忙裏偷閒為《Space Jam》配音短片曝光,一於懶理「加州內訌」的是非。

季後賽首圈8場對碰中,數快艇、勇士的對壘最有睇頭。雙方在常規賽的比併已經不時出現火爆場面,聖誕節的對碰中,勇士用激將法使得格芬吞下兩次技規被逐。常規賽4次對壘兩支加州球隊以2比2打成平手,為今次在季後賽相遇加添更多大戰味道;快艇、勇士都渴望在季後賽首圈勝出,成為真正的「加州之王」,未開波前已先爆發「口水戰」,希望在氣勢上先贏一仗。

奇利湯臣昨日於一個電台節目上先出招,稱格芬為「插水王」:「有時睇到格芬比賽插水,我會諗點解好似佢咁強壯嘅球員要成日插水。唔好搞錯,佢場外係個好人,但係佢打波時都幾粗野同埋太鍾意插水囉。」

懶理是非惡攪《Space Jam》

不過,格芬並不在乎奇利湯臣的指控:「我都有聽到個節目,不過我想講我先唔會插水。好似勒邦占士(LeBron James)同杜蘭特(Kevin Durant)咁,每場都有上佳表現,但係總有人講埋啲難聽說話畀佢兩個聽。我哋都控制唔到人哋把口,唯有當聽吓算。」而他早前在搞笑網站《Funny or Die》的節目上,與隊友迪安迪佐敦(DeAndre Jordan)為經典籃球電影《Space Jam》配音短片於網上被瘋傳,迪安迪佐敦扮名宿巴克利(Charles Barkley)的口音唯肖唯妙,惹得全場觀眾大笑。