政情：食得辣！小肥張又入市
政府為穩定樓市而推出嘅辣招影響強勁，不但令樓價回落，政府地又頻頻流標。不過，外號「樓王」局長嘅勞工及福利局局長張建宗（小肥張）就一於好少理，最近就向政府申報買多咗個位於港島東區嘅樓花，物業由佢太太擁有。根據利益申報表內容，小肥張同家人已有八項物業，所以今次都走唔甩要接樓市辣招，繳付雙倍印花稅，莫非小肥張真係唔怕辣？無論點都好，佢已向樓市投下信心一票。
港島區情有獨鍾
小肥張最近申報嘅東區物業樓花，喺佢最新提交到行政會議嘅個人利益申報表入面列出，該單位由佢太太持有，於今年一月十七日購入，係個尚未落成、位於港島東區嘅單位。總結現時小肥張已申報太太持有嘅住宅或商業單位共有九項，全部都係位於港島區，包括兩個中西區住宅單位、一個中西區商業單位、五個東區住宅單位及一個東區商業單位，似乎小肥張兩公婆對港島區情有獨鍾喎。
根據小肥張購入樓花嘅時間推斷，估計佢係買房協位於筲箕灣嘅樂融軒或北角一個樓花盤，但以樂融軒較為近磅。樂融軒嘅呎價平均一萬四千元，最平實用面積五百零八平方呎嘅兩房單位，就賣約六百五十萬元，最貴嘅六百七十一平方呎三房單位就賣約一千零一十七萬元，交通方便，喺港島區嚟講都唔算貴囉。不過，上述兩款單位嘅雙倍印花稅就分別要付約四十六萬元及七十六萬元。
雙倍稅都照買樓
雖然小肥張所申報嘅九項物業，自己只係持有其中半項，其餘幾乎都係由太太持有，如果新買嘅物業係由公司持有，咁就要畀買家印花稅，倘若係太太名下嘅，就要畀雙倍印花稅。照咁睇，小肥張無懼辣招勇猛入市，莫非睇好樓市前景？不過，樂融軒具有長幼共融嘅概念，鼓勵後生同長者一起生活，又可以喺同一地點分開居住，莫非小肥張上有高堂，想買嚟同啲長者一齊住？抑或買定畀自己將來同仔女住呢？