政情：區諾軒倡減暴動刑期 被轟變相鼓勵暴力
香港嘅示威浪潮已經爆發接近六個月，期間近六千人被捕，幾百人被控暴動罪。立法會議員區諾軒同朱凱廸就提出私人草案，希望將非法集結罪同暴動罪嘅最高刑期降低，結果就被轟變相鼓勵暴力囉！
呢條修改《公安條例》嘅私人草案已經獲得律政司發出證明書，草案建議將非法集結嘅最高刑期降至六個月，又將最高刑期為監禁十年嘅暴動罪降至三年，當中嘅集結人數由三人大幅提高至十二人等，聽落改動都幾多，而且全部對示威者有利。
「不如取消法律」
議員周浩鼎就認為兩人做法變相鼓吹暴力，直言幫暴徒減刑罰會對社會帶來壞影響，另一議員何俊賢就認為，草案難以喺今屆立法會中通過，質疑呢個係政治動作，仲鬧二人嘅建議「不如取消法律」，大嘆現時捉人已經唔易，又擔心年輕人見到刑罰咁輕，會變得心雄作出更多堵路、破壞等違法行為，最終只會變得更激進。其實區諾軒等人係咪嫌香港仲未亂夠呢？