政情：公民講場：貪曾爛攤子查極都唔完

最新一份審計報告批評盛事基金成效不彰、撥款混亂，甚至有明益自己友及有篤數之嫌。報告同時揭發原來自○八年開始，當局已發現公屋建屋量唔達標，以致無法兌現輪候三年上樓承諾。眾所周知，盛事基金係「貪曾」前特首曾蔭權爵士在任時嘅產物，聲言要推動香港成為「亞洲盛事之都」，但最後因當局監管不力而搞到一塌糊塗。至於三年上樓承諾失信於民，貪曾更加係罪魁禍首，任內明知公屋供應唔達標仍遲遲唔加建公屋，連累新政府孭鑊。估唔到貪曾執包袱卸任咁耐，佢嘅蘇州屎至今仍遺禍香港，真係查極都查唔完。