食完飯梗係要抹嘴o架啦，否則好容易被稱呼為污糟貓。偷食更加要抹嘴，除非你唔介意罪證確鑿。抹嘴係現代人必要嘅文明禮儀，問題係用乜嘢抹嘴好呢？功夫茶之所以有此一問，原因係內地傳媒最近揭發，唔少餐館所提供嘅紙巾相當令人擔心，竟然可能係利用廢紙製造，問你怕未！
你知啦，廢紙製造紙巾，衞生一定有問題，因為冇人知道廢紙嘅前身係乜東東，處理過程又唔知有冇攙雜有害成分。最低限度令人擔心嘅係，廢紙製造紙巾嘅工序之一係使用螢光劑增白，而研究顯示部分螢光劑可能導致白血病！
即係咁，記者從北京十間大大小小嘅餐館收集用餐紙巾，邀請專家測試之後發現，只有兩間餐館嘅紙巾完全冇螢光劑。對於相關餐館嘅樣本，專家分別做咗三個實驗，有啲紙巾含有一定面積嘅螢光劑，有啲紙巾燃燒後顏色發黑，纖維成分少，可能係攙合咗雜質嘅廢紙製成。含有螢光劑嘅紙巾，包括來自知名國際連鎖快餐店，真係令人防不勝防。
製造紙巾之所以用廢紙，原因一字咁淺，為咗節省成本。廢紙造成嘅紙巾每噸價格一千五百元人民幣，用純草漿就每噸二千五百元，純木漿製造接近每噸五千元，貪便宜嘅餐館就以劣貨侍客嘞。用廢紙製造紙巾之後，生產商一般會加入滑石粉同碳酸鈣，仲會以螢光劑增白，目的有兩個，重量夠，賣相好。
睇完功夫茶嘅敍述，大家係咪覺得毛管戙？畢竟香港同內地嘅親密關係非比尋常，你中有我，我中有你，內地有乜，香港有乜，北面唇亡，南面齒寒。萬一香港餐館提供嘅紙巾同樣含有螢光劑，抹完嘴居然中毒，好鬼死大劑o架喂！
除咗香港餐館有機會出事之外，港人北上尋歡覓食又如何？北京有嘅，全國各地都會有，港人經常去嘅深圳當然亦唔例外。
講到呢度，又係時候問候一下內地官僚及香港食安中心嘅諸色人等，各位老爺，各位奶奶，你哋究竟點樣把關？食咗飯未呀？撩咗牙未呀？抹咗嘴未呀？閣下抹嘴用嘅係餐館提供嘅紙巾，定係私家自備嘅毛巾呀？假如一個唔小心用咗餐館提供嘅紙巾，麻煩各位老爺奶奶馬上去驗身，順便查驗一下相關紙巾是否含有螢光劑，否則，食飯食到白血病就唔好啦。
話時話，既然紙巾有可能係廢紙製造，功夫茶有一個大膽假設，特區政府有唔少衙門嘅組成部分係廢官，特別係經常把關不力嘅食安中心。潮流興源頭減廢，食安中心不如自我改造踢走廢官啦！