前政務司司長唐英年最近再次人氣急升，事關佢尊夫人郭妤淺受到法律制裁，由於僭建地下宮殿而被罰款十一萬元，證明唐唐當日所講嘅「掘深咗」簡直係廢話。一提到唐唐，再提到廢話，自然諗起呢一位金句王嘅經典名言Completely Rubbish，可以解作完全垃圾，亦可解作純屬廢話。
其實唐氏金句Completely Rubbish嘅適用範圍非常廣泛，幾乎可用於每人每事每物，尤其係關乎官場嘅一舉一動。就舉一個例子吖，環境局針對棄置廢物嘅政策，大家不妨形容為Completely Rubbish，一來因為官老爺真係要處理垃圾，二來佢哋拋出嘅方案真係好鬼死垃圾。好似擴建堆填區咁吖，思慮不周，章法大亂，搞到向立法會闖關以失敗告終。
奧運金牌得主李麗珊曾經講過，香港運動員唔係垃圾。之但係好可惜，負責環保工作嘅港產官僚相當垃圾。喂，現有堆填區好快就要飽和o架喇，既然暫時冇得擴建，迫在眉睫嘅垃圾問題點樣解決呀？本來係可以加強源頭回收，或者興建垃圾焚化爐，不過前者唔知幾時落實，後者就受到諸般阻撓。
即係咁，特區政府打算喺石鼓洲興建焚化爐，有長洲居民提出司法覆核，雖然今年七月被高等法院原訟庭判以敗訴，不過佢隨即申請法援準備提出上訴。法援申請最近獲批，即係話興建焚化爐大計再次面臨法律挑戰，唔知仲要拖到幾時。大家都知喇，弱勢政府動輒得咎，隨時被法庭判敗訴都似。
唔知大家點睇，功夫茶就覺得當一個政府弱勢嘅時候，硬係頭頭碰着黑，人衰行路打倒褪。興建焚化爐之嘛，竟然受到重重掣肘，一個唔覺意又會受到類似擴建堆填區嘅挫折。話就話環境局評估形勢之後認為敗訴機會不大，所以決定如期明年重推焚化爐方案，近日更加落區硬銷。之不過咁喎，訴諸法庭呢家嘢冇人敢寫包單，若然真係打輸官司點算呢？焚化爐仲建唔建呢？垃圾又點處理呢？
可以咁講，環保政策，完全垃圾。其實當今科技發達，焚化爐設備先進，唔會對環境造成太大影響，港產官僚咁都無辦法說服市民，證明佢哋失敗囉。除咗處理垃圾拿不出辦法之外，最令人痛心疾首嘅係空氣污染遲遲未改善。你知啦，人類嘅肺部其實好脆弱o架咋，吸得多污染物質咯喎，輕則咳嗽連連，重則短命幾年。
總而言之，搞環保唔能夠靠廢話，推出嘅政策千祈唔好太垃圾，否則環境局一眾官僚難免被標籤為Completely Rubbish！