慎防吸血中介王 警方勿掉以輕心

「吸血貴利王」大家應該聽過,最好就唔好見過,更加唔好幫襯過,否則肯定麻麻煩煩一身蟻。大家又有冇聽過「吸血中介王」呢?如果未聽過,今日功夫茶同大家介紹一下,以免各位糊裏糊塗淪為受害者。

嗱,大家平日可能會接到三唔識七嘅推銷電話,如果你唔係覺得煩而第一時間收線,你或者會聽到對方聲稱能夠提供一項「借貸中介服務」,仲係不成功不收費。所謂借貸中介服務,即係由中介公司帶你去問財務公司借錢。大家或者會問,財務公司係咪惡名昭彰嘅大耳窿呀?可能係,可能唔係,不過呢一個唔係重點,重點係中介公司嘅不成功不收費原來係呃人o架,佢哋其實唔理你是否成功借錢,都會收取貴到離晒大譜嘅手續費!

有政黨接獲市民求助個案,有一間貸款中介公司承諾不成功不收費,求助人於是簽署借貸合同啦,點不知財務公司嘅還款條件遠遠超出求助人嘅能力負擔範圍,所以最終都冇借錢。之不過問題係,中介公司以合約條文為由,追討貸款總額嘅百分之十八手續費同律師費,合共兩萬元。簡單咁講,中介公司唔止搵笨,簡直係老屈,就算你冇向財務公司借錢,你都要乖乖向呢一種「吸血中介王」獻上一大筆血汗錢,否則後果可能好嚴重,因為佢哋好大可能就係惡名昭彰嘅大耳窿化身!

好嘞,若然各位不幸遇到咁嘅情況,係咪可以報警要求執法者介入呢?對於呢個問題咯喎,功夫茶有少少擔心,事關警方竟然話「不涉刑事成分」。

呢嗱嗱嗱,功夫茶點都唔信真係不涉刑事成分。不如咁啦,睇睇一單案件,新界北警方曾經接報,有債仔向財務公司借款六千元,中介公司居然收取五千三百元手續費,債仔最終只係得到七百元貸款。警方蒐證之後終於證明,中介公司同財務公司合謀,於是引用相關條例之中嘅「放債人向借貸人收取酬金」罪名,成功將中介公司一名職員入罪,被告多番上訴失敗,終審法院今年八月定為案例。

大耳窿化身中介公司,其實係高利貸集團逃避刑責嘅方法,以中介公司名義介紹債仔向財務公司借貸,從而收取離晒大譜嘅手續費,由於手續費唔係利息,所以難以被控「放高利貸」罪名。債仔假如唔肯就範,後果耳熟能詳咯,淋紅油呀,塞鎖匙窿呀,玩威嚇呀,要幾卑鄙就有幾卑鄙。

講咗咁耐,功夫茶一來忠告大家唔好上當,慎防呢一種喬裝易容嘅吸血鬼,二來促請警方嚴厲執法,唔好掉以輕心呀!