秋冬時節，風高物燥，大家除咗要注意防火之外，仲要注意乜嘢呢？答案就係注意健康嘞。尤其係兒童，由於呢個季節氣溫變化大，兒童免疫力又比較低，一個唔好彩，隨時中招o架。
唔係危言聳聽，亦唔係無的放矢，簡稱肺炎球菌嘅入侵性血清三型肺炎鏈球菌近日連殺兩名幼童，一個係三歲男童，一個係五歲女童，分別於本月十七及十八日病逝，搞到人心惶惶。初步調查顯示，該名女童最近並冇外遊，即係話，呢宗係本地感染病例。專家指出，呢種肺炎球菌係本港最常見嘅「惡搞」品種，由於毒性強，感染者較常出現壞死性肺炎、肺膿腫等，而且對部分抗生素呈抗藥性，救治特別困難。
大家咪以為淨係兩宗病例吖，今年截至九月，衞生防護中心共接獲一百零九宗入侵性肺炎球菌個案，十八歲以下人士佔十一宗。而瑪麗醫院除咗接獲該名三歲死亡男童個案外，另有三名感染血清三型嘅兒童，因肺膿腫需接受手術。肺炎球菌防不勝防，你都咪話唔擔心。
面對呢種惡搞嘅肺炎球菌，當局又有乜嘢動作呢？衞生防護中心發信全港醫生通報肺炎球菌嘅抗藥情況，提醒小心選用合適抗生素。而衞生署轄下疫苗專家委員會亦決定提前於下月初開會，探討接種疫苗情況，至於會唔會為所有六歲以下兒童接種新疫苗，有待專家委員會建議喎。
嗱，防疫宜早不宜遲，肺炎球菌已經連殺兩童，應該點樣防疫，係咪需要注射疫苗，必須及早決定，唔可以再拖拖拉拉喇。正如醫生話齋，如果小童未打十三價肺炎球菌疫苗，應該盡快補打，估計全港有三十萬兒童需要補針，唔等得o架。
講開又講，好多家長根本唔清楚子女曾經注射邊種疫苗，同埋依家究竟需唔需要補打，當局係咪有責任向家長解釋清楚呢？即係咁，預防肺炎球菌有多種疫苗，衞生署○九年引入七價疫苗，一一年及去年又先後引入十價和十三價疫苗，對抗最惡搞嘅肺炎球菌。今次呢位五歲死亡女童從未接種任何疫苗，對肺炎球菌完全不設防，一染病即奪命；而三歲死亡男童雖注射過七價及十價，但冇注射過十三價，結果同樣不敵病毒。
所以話，防疫必須與時並進，肺炎球菌品種不斷轉變，唔係注射過疫苗就大安旨意o架。為子女健康着想，家長固然要盡快帶佢哋接種最新疫苗，而衞生當局更加要打醒十二分精神，做好自己份工。咪話功夫茶唔提醒吖，隨着天氣逐漸轉冷，流感等其他疫症高峰期殺到，加上禽流感又虎視眈眈，當局唔好等到大爆發至補鑊呀！