中環出更：撐公民教育被屈「洗腦」 李美辰喊冤
政府年前推「國民教育」引起爭議，去年立法會選舉中，參選過新界西直選嘅和富社會企業主席李宗德長女李美辰（Christina），憶述參選時曾被指撐「國民教育」被人鬧到抽筋，認真無辜，其實佢講嘅係「公民教育」。Christina話，佢本身都唔支持洗腦教育，應向學童提供多啲資訊，畀佢哋理性分析。
攜子女遊內地 增認同感
Christina認為，公民教育好重要，事關佢曾負笈海外，見識過部分外國人冇敬老、又唔尊師重道嘅觀念後，覺得身為中國人好自豪。佢同身為香港青年聯會司庫嘅丈夫蔡德昇育有兩子一女，不時攜子女遊歷中國各地，提升子女嘅身份認同感，今個暑假就去咗海南度假。
唔少人認識和富，都係由「和富大埔」足球隊開始，但原來Christina係唔識欣賞足球嘅，反而佢媽媽對足球就好有興趣，旗下足球隊幾乎每場賽事，李媽媽都會親自到場打氣，佢笑言：「阿媽對班球員好熱心o架，有時見到佢哋受傷，仲會主動帶佢哋去睇跌打添！」
卓妮