政情：特首論壇 爆撲飛大戰
香港人去排隊最常見嘅事通常係買飛、買樓或輪米，但依家竟然興排隊攞籌去見特首。話說特首梁振英（CY）呢兩個月三次落區搞論壇，唔單止提早排隊攞飛入場嘅市民一次比一次多，而且仲一次比一次早去排隊。好似今日灣仔地區論壇，「女長毛」雷玉蓮竟然前晚率先去到禮頓山社區會堂外排隊攞籌，尋日早上先至輪到疑似建制派動員嘅人士到場，三百張入場券籌話咁快就派完，認真誇張。
社民連人力 遲到撲空
唔知大家仲記唔記得，CY首先喺天水圍搞論壇，最早排隊攞飛嗰位市民係喺論壇舉辦前廿八小時到場。之後到觀塘嗰次論壇，就係女長毛喺論壇舉行前三十個小時到場。至於今日舉行嘅灣仔論壇又點呢？據手持一號籌嘅女長毛消息指，佢提早咗四十幾小時到禮頓山社區會堂外排隊，當時仲未有人排隊，直至昨晨七時許，先至開始有五、六個婆婆跟佢後面排隊。女長毛話，明知建制派會總動員出席最後一場論壇，所以早啲到喎。
至於網上傳言話建制派會動員一車車載人到場排隊攞籌，據目擊情況嘅女長毛話，當佢朝早七時許同六個婆婆行到警方嘅指定輪候區時，就聽到民政事務處職員話，要親身到場等候先有飛攞，報紙、錢包或櫈仔一律唔計數喎。唔知係咪呢個原因，約八點鐘左右，有六、七架大旅遊巴駛到附近，有老有嫩嘅幾百人陸續到場，而民政處為免混亂，喺九點鐘開始派籌，九點二十分開始截龍，所以九點鐘之後到場嘅社民連及人民力量就冇飛攞喇，咁長毛梁國雄咪無得入場？
咁旅遊巴接載到場嘅人士，究竟係咪建制派動員嘅呢？我哋喺現場所見，似乎係有組織排隊，佢哋唔單止一齊買飯，亦有專人喺鐵馬外派飯盒、派水，仲有啲操大陸口音嘅人士阻礙記者拍攝添。不過，排喺接近龍尾嘅渣甸坊商販協會劉啟明就話，見唔到有旅遊巴載人嚟排隊，佢啲朋友亦話係有人講得太誇張喎。
至於舉行論壇嘅鄧肇堅維多利亞官立中學場外，警方已放置大量鐵馬，亦喺中午開始封閉中學對面嘅伊斯蘭中心正門。警方話已收到三個團體嘅示威通知，並發出不反對通知書，警方屆時按需要劃分示威區，但唔會封路喎。