十二年係一個輪迴，亦係一個開始。《東方日報》自從二○○○年十月十八日以來，十二年來從未加價，一直本着服務社會嘅精神，維持六元售價。大家都知道，十二年唔係短日子，足以完成鼠牛虎兔龍蛇馬羊猴雞狗豬生肖循環，期間通貨膨脹導致成本高昂，尤其係紙價不斷上漲，已到咗不勝負荷嘅地步，《東方日報》不得不做出一個事非得已嘅無奈決定，四月七日起調整售價至七元，希望讀者見諒！
各位親愛嘅讀者，十二年幾先至加價一元，喺百物騰貴嘅今時今日可以講係十分溫和嘅喇，只要你諗到樓價長升長有，只要你諗到有業主一加租就係一倍，你就會發覺東方報業集團以讀者為先，一以貫之秉持服務社會嘅精神。
不離不棄嘅忠實粉絲一定知道，本報以讀者為先、服務社會唔係空口講白話o架。就以東方日報慈善基金嚟講吖，一直本着扶危濟急嘅宗旨，推動社會公益，幫助弱勢社群，成立近三十年來助人無數，深獲社會好評，受到讀者信賴，呢啲咪就係取諸社會、用諸社會嘅最佳典範囉。
講番今次調整售價，唔係收多一元就算數，梗係要加強內容回饋讀者啦。功夫茶可以擔保，各位付出七元買一份《東方日報》，絕對係物超所值。大家可能會問，本報內容已經係全港最強啦，遠遠拋離競爭對手九條街，否則唔可能維持三十幾年銷量第一，仲點樣可以強上加強呀？對於呢個問題咯喎，功夫茶只可以講，人類潛能係無限嘅，已經最強不代表唔可以更強。譬如話，《東方日報》嘅版面美術將會更加悅目，又譬如話，長期深受讀者愛戴嘅「探射燈」將會增設新欄目，而且版面以破格形式設計，務求達到吸引眼球嘅絕佳效果。
仲有吖，本報最引人入勝嘅內容之一係娛樂版，又有乜嘢可以強上加強呢？等功夫茶透露少少畀大家知啦，如果你想睇一睇藝人自述鮮為人知嘅一面，你就要密切留意娛樂版啦，包你有意外驚喜！
一份綜合大報嘅組成部分仲有好多，財經呀，馬經呀，副刊呀，體育呀，男極圈呀，各個環節強上加強嘅具體做法到底係點嘅呢？如果不厭其詳一一列舉出來，大家可能會感到應接不暇，不如咁啦，各位讀者自行發掘一下，從中享受尋寶嘅樂趣。
總而言之，有東方，冇窮人，銷量第一嘅《東方日報》成功之道就係內容取勝，精益求精，調整售價至七元一定唔會令大家失望嘅，多謝捧場！