英國名著《動物農莊》話齋，所有動物生而平等，不過部分動物比其他動物更平等。周一嶽身為官場動物，唔使多講嘞，佢嘅待遇比起其他動物更平等。非常諷刺嘅係，周一嶽被委任為平等機會委員會主席，每個月以大拿拿二十二萬元公帑出糧。喂，一隻擁有更平等機會嘅官場動物，肩負重任處理全港市民嘅平等機會，你話係咪荒謬絕倫吖？
之所以話周一嶽擁有更平等機會，道理好簡單啫，佢老哥以往出任食物及衞生局局長八年期間，醫療失誤頻頻，疫症爆發連連，雙非問題又束手無策，醫護短缺又後知後覺，徹頭徹尾就係一個可撥歸廢柴類別嘅官僚，如果唔係都唔會有一個街知巷聞嘅花名「周一鑊」，每周總會孭一鑊咁解。既然係咁，照道理應該冇資格捲土重來出任公職吖，偏偏周一嶽唔知點解得到遴選委員會青睞，竟然被認定適合做平機會主席。咁難以置信嘅人事任命，當然係比其他動物更平等嘅特殊待遇啦。難怪有人話，平機會淪為退休高官俱樂部。
對於辭官短短八個月無端端「廢官翻閹」嘅周一嶽，「東方報業民意調查」顯示，四成四受訪者認為佢欠缺處理人權事務經驗，並非平機會主席適當人選；兩成四質疑佢同政府關係千絲萬縷，擔心處理投訴之時有偏頗；一成一形容呢個係反智任命。
咁嘅任命有幾反智呢？功夫茶忽然之間覺得，公營機構變成循環再用嘅廢柴庇護工場，而且被翻閹嘅機會完全不平等，你話唔係反智都唔得啦。
民意調查又顯示，周一嶽掌管醫療衞生八年，三成七受訪者批評佢一無是處，政策混亂；一成九認為佢濫竽充數，表現拙劣；一成八指摘佢麻木不仁，難為弱勢主持公道。講真吖，呢個平機會主席確係好難得到普羅大眾信任，所以關注性歧視團體質疑佢在立法平權方面將打倒褪，更有關注少數族裔組織表示，將會遠赴日內瓦出席聯合國人權事務委員會舉行嘅聽證會，投訴今次任命缺乏透明度，損害平機會獨立性，擔心政府會重蹈前特首曾蔭權嘅覆轍，漠視少數族裔嘅存在。
其他調查數據唔再多費唇舌嘞，功夫茶同大家研究一個問題，若然一個公職人員居然犯法，事後又拒絕修正，仲有冇資格處理平等法則呢？你知啦，周一嶽係其中一個違規僭建嘅達官貴人，人哋僭建被揭發都會急急忙忙恢復原貌，之但係佢老哥闊佬懶理，至今仍然未清拆僭建物。一個視法律如無物嘅平機會主席，有乜可能得到民眾支持呢？
平機會如果真係想人人機會平等，終止周一嶽任命重新招聘好過啦！