人一走，茶就涼。前朝煲呔曾爵士實牙實齒話要發展醫療產業，點知講嚟講去得個吉，隨着改朝換代，人亡政息，醫療產業亦無疾而終。不過咁，此處不留人，自有留人處，香港搞唔成醫療產業啫，唔代表內地冇得諗o架。
呢嗱，本港著名眼科醫生林順潮喺深圳開辦嘅首間獨資眼科醫院日前開張，為醫療產業北上打響頭炮。萬事開頭難，既然CEPA開綠燈，准許港商喺內地多個省市開設獨資醫院，亦准許醫療專才北上搵食，類似例子相信將會陸續有來。正所謂，天下熙熙，皆為利來；天下攘攘，皆為利往。內地市場龐大，有錢人愈來愈多，而國產醫療又聲譽欠佳，令人信心盡失，香港醫療食住條水，唔憂冇得做，賺人民幣隨時仲好過賺港幣吖。
家陣嘅問題係，醫療專才紛紛北上搵人民幣，咁香港又點算呢？大家都知喇，公立醫院人手本來已經嚴重短缺，十個煲七個蓋，如果醫生繼續流失咯喎，豈不是雪上加霜，隨時變成十個煲五個蓋？就以新界東嘅龍頭威爾斯醫院嚟講吖，急症室醫生上年度流失率高達兩成，人手比正常編制短缺三分之一，搞到夜更得兩個醫生當值，機器都唔掂喇，何況係人，唔怪得近年公院醫療事故頻頻。
嗱，唔係功夫茶亂噏o架，連食衞局局長高永文都擔心人手問題。佢話，愈來愈多香港醫療專業人才到內地發展，包括開設醫院，就算短期內未必出現一窩蜂效應，亦唔可以忽視呢個趨勢，更加唔可以忽視對本地醫療人手嘅影響喎。
冇錯嘞，北上開醫院就話關卡重重唔係咁容易啫，但醫療專才北上搵食隨時都得o架，如果有朝一日出現一窩蜂，咁香港就大劑喇。高永文話喎，當局將會檢視整體醫療人手及培訓，幾年後兩間醫學院嘅醫科生將會由每年三百人增至四百人。
即係咁，日後醫科生每年增至四百人係咪足夠，暫時仲未知，依家嘅事實係公立醫院七國咁亂，士氣低落，等當局增加醫科生咯喎，遠水都難救近火喇。最搞笑嘅係，醫管局早前諗住招聘海外醫生救急，點知百幾人申請，最終只有十四人符合條件，你話係咪嘥氣吖！
所以話，冇咁大個頭唔好戴咁大頂帽，貪曾嘅所謂醫療產業，純粹得啖笑。雖然呢個爛攤子係前朝留低，更加係前食衞局局長周一嶽嘅罪證，但高永文作為繼任者，無論如何都要面對o架喇。咪話功夫茶唔提醒吖，如果醫療產業北上成為趨勢，公立醫院人手不足嘅問題只會更加惡化，依家仲唔未雨綢繆，到時至補鑊就遲喇！