保險界陳健波：「你上任之後，有幾個重要問題是處理了，包括雙非、叫停擴大自由行、港人港地和樓價等，不過另一方面，你的僭建問題亦都令到社會人士對你有懷疑。」
民建聯蔣麗芸：「你間屋為你確實帶來不少煩惱，你會否考慮把你那間屋賣了？可以讓你在未來嘅日子專心為香港制訂更多、更好嘅政策呢？」
獨立謝偉俊：「我非常之震驚話你無講過無僭建問題，證明你依然執迷不悟……你能唔能夠唔好再用『無講過』、『開誠布公』又或者『我喺處理僭建問題上有疏忽』呢啲咁虛嘅字眼，而係真真誠誠、切切實實為三個團體道歉。」
廠商會林大輝：「人人都會犯錯，就梁振英同唐英年兩位嘅僭建事件，令我諗起師傅講嘅一句說話，『昨天嘅因，今天嘅果，今天嘅因，明天嘅果，因果循環，報應不爽，阿彌陀佛』……你有無自我反省過過失，同評估有無令中央政府對你嘅誠信、管治能力有動搖或質疑？」
工聯會黃國健：「喺特首答問題嘅過程中，我發現一樣嘢更加重要，特首答問題唔肯服輸，唔忿氣，所以就講咗『我無講過無僭建』呢啲意氣嘅說話。雖然你喺度有道歉，但畀人感覺好唔忿氣，你呢啲唔肯認衰嘅態度，係會影響市民接受你嘅道歉。」
人民力量黃毓民：「主席，請佢答我，個『醜』字幾多畫？佢梗係唔知啦，佢都唔知個醜字點寫……你嘅人格咁卑下，連個醜字都唔識寫，你仲唔鞠躬下台？請你立即下台！」
工黨李卓人：「我覺得梁生係厚顏無恥，你係專業嘅騙子，你呃咗全香港人，係呃咗特首個位……你去砌唐英年誠信問題，依家有報應啦！」
公民黨郭家麒：「你要今日香港向前行，我相信市民有一個心願，一人做事一人當，如果特首無誠信，佢係咪要辭去佢呃番嚟嘅職務，等香港有一個重新嘅開始？」
民主黨何俊仁：「喺選舉論壇上，你強烈攻擊你嘅對手唐英年，你話你嘅僭建並唔係僭建問題咁簡單，係誠信問題……大家會覺得你係賊喊捉賊，你講呢番說話嘅時候實際上係呃緊市民，呃緊傳媒，呃緊選委，你同唔同意你特首個位都係呃番嚟？」