好咯好咯，開波開波，鹹魚翻生嘅扶貧委員會終於召開第一次會議，討論嘅係行政長官梁振英競選之時所提出嘅扶貧政綱，以及如何訂立貧窮線。
扶貧委員會之所以話係鹹魚翻生，原因非常之咁簡單，前朝曾蔭權政府唔知黐咗邊條筋，居然喺貧窮大軍愈來愈聲勢浩大嘅情況之下，砰嘭一嘢將委員會摺埋收檔。功夫茶以君子之心度小人之腹，原因大概係煲呔曾臨落台之前忽然富貴，繼而產生一個不切實際嘅幻覺，既然自己都有私人飛機同豪華遊艇管接管送，呢個世界應該唔存在冇瓦遮頭嘅窮人o架啦，所以扶貧委員會已經完成歷史任務。
問題係，現實世界不以主觀意志而轉移，非常嚴重嘅貧富懸殊並唔會由於掌權者「曾門酒肉臭」而消失得無影無蹤。所以咯喎，當今梁朝政府未上台揸莊之前已經拍晒心口承諾，扶貧委員會一定擇個吉日捲土重來，繼承前人遺願福為民開。可惜當中有少少濕滯，畢竟振英哥哥上任以來諸事不順，唔係呢個政策被推倒，就係嗰個措施被扑低，幾經艱辛拉牛上樹先至騰得出手腳開會討論扶貧。
好嘞，初試啼聲嘅扶貧委員會到底討論咗乜東東呢？請恕功夫茶老實不客氣，會議內容基本上係以肺部發聲嘅廢話居多。梁振英話喎，貧窮問題積存社會已有一段長時間，問題既複雜又廣闊，對於香港呢個平均發展水平較高嘅社會而言，除咗係公義問題，亦都係政治問題。梁特首又話，有需要制訂貧窮線，以顯示政府有決心正視貧窮問題。
喂喂喂，正視貧窮唔代表解決問題，一眾宅男夠成日正視靚女啦，你估孤枕獨眠嘅問題就會迎刃而解咩？不妨咁樣講吖，只係噴口水係於事無補o架，蔭權七年蹉跎歲月已經係慘痛教訓啦。
即使睩大對眼正視貧窮問題，會議都冇乜實質成果喎。對於貧窮線應該點樣制訂，有人話要參考國際做法。之不過咁，國際做法五花八門，經合組織採用住戶入息中位數五成，歐盟嘅貧窮線定於入息中位數六成，另外亦有以個人收入或家庭膳食開支作為貧窮線嘅準則。扶貧委員會仲要考慮入息應否扣除福利資助，由於問題複雜，所以政府傾向由政務司司長林鄭月娥帶領社會保障及退休保障專責小組，研究貧窮線嘅制訂工作。簡單咁講，第一次開會嘅結論係，乜鬼結論都冇，一切繼續研究研究再研究。
嗱，唔好話功夫茶唔提醒梁振英，口水治港絕不可取，必須交出實際可行嘅辦法解決貧窮問題，否則咯喎，五年一覺特首夢，贏得空談誤港名！