政情：煲呔曾製三大怪獸虐民

衣食住行一直係市民最關注嘅議題，國家領導人多次同煲呔曾會面時都要求佢要處理好深層次矛盾問題，但過去幾年煲呔曾都無視有關溫馨提示，喺衣食住行呢幾個市民最關心範疇都交白卷，最離譜嘅係煲呔曾仲最少製造咗三大怪獸與民為敵。

煲呔曾製造嘅「頭號」怪獸係樓價高，搞到樓價不斷攀升甚至高過九七年高峰時期嘅水平，搞到坊間嘅劏房如雨後春筍，相反利民嘅復建居屋就一拖再拖，直至臨「退伍」前先不情不願咁提出「置安心」呢個怪胎，煲呔曾有幾以民為本，大家都心中有數。

「雙非」孕婦來港產子問題近年鬧得熱烘烘，煲呔曾政府任由內地人嚟香港生仔，但又唔搞好配套，終於私家醫院為收內地客瘋狂加價，港人生仔都幾乎無床位，候任特首梁振英（CY）早前提出私院「零配額」廣受家長好評，有私院代表仲警告話會有私院因而倒閉，最後喺民意輿論下先讓步接受，可見私院過往疑似喺無王管下有幾有恃無恐。

政黨求助CY處理課本問題

最新蒲頭嘅一隻「怪獸」係書商霸權，無論教科書分拆或電子教科書，政府同書商傾咗幾年，始終於都無法解決教科書愈賣愈貴嘅問題，書商尋日仲拉大隊到申訴專員公署投訴教育局添，有政黨尋日睇唔過眼即時到CY辦公嘅候任辦求助，呼籲佢以處理「雙非」撲出嚟嘅態度，喺九月開學前提出解決嘅辦法喎。

對於喺煲呔曾任期內孕育出嚟嘅幾隻怪獸，市民都想掃走佢哋，而CY未上任，就已經採取緊措施。好心煲呔曾唔好懶偉大咁，話如果有歐債危機就最好早啲嚟，等佢嘅政府可以應付啦，歐債危機都未嚟，香港就已經畀佢留低嗰啲怪獸搞死喇。

煲呔曾尋晚去演藝學院，頒發終身成就獎畀戲劇大師鍾景輝（King Sir）。煲呔曾有感而發，話尋晚係佢任內最後一次頒獎，又話King Sir一直係唔會畀人「柴台」嘅最佳男主角，所以奉佢為偶像。畀人「柴台」係有原因嘅，煲呔曾自己反省吓啦。