中環出更：高「局長」避嫌 中獎唔敢要
煲呔曾貪威識食醜聞，令公職人員形象嚴重受損。前車可鑑，疑似下屆食物及衞生局局長高永文，同特首辦主任梁卓偉（Gabriel）都打醒十二分精神。前晚喺醫療專業人士協會晚宴上抽到大獎，高醫生將份禮捐出來做善事，Gabriel亦即場拒收，咁廉潔，呢啲咪係公僕最佳榜樣囉。
醫專會前晚筵開廿多圍，慶祝成立四周年，主席江明熙同副主席鄭淇德醫生面子夠，城中名醫雲集。除醫管局行政總裁梁柏賢、中大校長沈祖堯，仲有「金刀梁」梁智鴻等。群醫輪流上台唱歌，骨科名醫潘德鄰就大玩魔術，氣氛高漲。
梁卓偉合唱「嶽曲」勁肉麻
盛傳會返港大執教鞭嘅Gabriel歌癮大發，同「無得留底」嘅食衞局局長周一嶽合唱一曲，Gabriel揀來一首《局長湊大我》，即係乜歌？原來係《You Raise Me Up》，憑歌寄意，認真肉麻。
江明熙都同醫生樂隊Jam番幾首英文歌，「Chok樣」引來台下女粉絲排隊送花。晚宴高潮，係壓軸抽獎。高永文時運高，抽中一圍酒席，菜單寫明有龍蝦、紅燒翅、鮑片等，閒閒哋值五、六千元。領獎一刻，席上有人搞鬼大嗌：「局長唔收得禮物o架噃。」高醫生尷尬上台領獎，落台後即時將酒席捐番畀醫專會，等佢哋慰勞吓義工。
話口未完，Gabriel都中大獎，抽中一部OSIM頸部按摩器，價值以千元計。Gabriel唔敢收，耍手擰頭話：「好大壓力呀。」結果佢將份禮捐番出嚟，再抽過。
卓妮