政情：女拔校長撐唐太惹風波
女拔萃校長兼婦女事務委員會主席劉靳麗娟挺唐太挺出大頭佛！話說唐英年喺特首選舉落敗前，喺多份報章刊登選舉宣傳廣告，刊載一班支持者及市民嘅「挺唐」留言，當中包括劉靳麗娟力撐唐太郭妤淺（Lisa）嘅一段留言，題為「Lisa，我為你鼓掌」。不過，尋日我哋就收到投訴，質疑劉太竟然力撐身為僭建主謀嘅唐太，問佢以後仲點教學生守法喎。
劉太喺留言中直指唐太近日出嚟表述「真摯感人」，深深感受到唐太對家庭、丈夫嘅愛，又欣賞唐太能坦然面對四方八面嘅壓力，仲話喺唐太身上「看到高質素教育的完美演繹」。雖然劉太行文隻字不提僭建風波，但相信市民好清楚唐太係唐宅僭建風波嘅始作俑者，但劉太並未對唐太涉嫌違法嘅行為給予半點指摘，又好難怪有市民反感嘅。不過，公說公有理，婆說婆有理，作為婦女互撐都無可厚非嘅！