政情：湯漢寄語新特首要謙厚
上任無耐嘅天主教香港教區主教湯漢，尋日喺一個電台錄音節目上寄語，新特首應該要愛民愛港，有智慧同成熟，未來要落實一人一票選特首，亦要解決貧富懸殊同老人問題。湯漢仲向新特首送上金句：「非爾役人，乃役於人」，即係話坐喺乜嘢位置，都要認為自己處於眾人之下，真誠服務所有人。
作為首個喺香港土生土長嘅樞機，佢喺節目上暢談做樞機嘅心路歷程。原來佢喺中環士丹頓街出世，依家已經變咗間餐廳，佢間中經過都會望望緬懷吓。日軍佔領香港，佢兩歲嗰陣走難到廣州，成日四圍玩泥沙、捉迷藏，直到四九年讀小學四年級，第一篇作文竟然係《論勞動》。
湯漢話，好在自己夠聽話，就算人哋打交，佢都淨係會企埋一邊，叫佢跳舞又唔托手（月爭），幫手洗韓戰士兵衫又肯洗。之後佢接觸多咗外國傳教士，眼見佢哋全世界四圍傳教，受到好多人感激，因而令佢感動，八歲就領洗，皆因想走去其他國家幫人喎。