恭喜恭喜，豬豬輸咗！賀喜賀喜，狼狼贏咗！第四屆行政長官選舉塵埃落定，冇流選，冇重選，一號候選人梁振英有驚無險成為候任特首，將會取代晚節不保嘅曾蔭權，請鼓掌！
咦，咪住先，香港依時依候換特首，能唔能夠換來一片新天新地㗎？有冇可能掃走烏煙瘴氣先？梁特首得票約六成，夠唔夠牙力撥亂反正呢？你知啦，香港回歸十五年以來蹉跎歲月，留低百廢未舉爛攤子，如果新特首強勢不足，施政肯定困難重重。簡單咁講，新一屆政府面對好多挑戰，一定要強者先至可以清洗頹風，撥亂反正。
話時話，現時香港無論民生、經濟、政治同基建發展都存在大量問題，不如睇睇民間意見有乜講法吖。「東方報業民意調查」顯示，大部分受訪者認為香港有唔少隱憂，五成三覺得發展停滯不前；兩成一擔心歐債危機揮之不去；一成七認為公務員士氣受挫。
講到公務員士氣受挫，功夫茶不得不提貪曾事件。喂，堂堂特首依偎富豪飲飲食食上天下海周遊列國，一連串貪腐醜聞害到香港廉潔形象一落千丈，公務員士氣唔受挫就假啦。所以咯喎，梁振英上任之後一來必須潔身自愛，二來亦要嚴肅處理貪曾。
講番民意調查，經濟方面有六成二受訪者期望新政府優先處理通脹持續高企嘅問題；一成六認為失業率開始回升，應該關注就業不足；一成六要求關注經濟增長放緩情況。
民生議題又點呢？三成九受訪者認為雙非孕婦湧港產子問題嚴重，期望優先解決；兩成五覺得要優先處理嘅係房屋問題；兩成四要求正視貧富懸殊；一成促請改善醫療服務質素。
講到呢度，功夫茶有必要停一停、抖一抖，事關「曾氏政權後遺症」實在太多太多，再係咁數落去唔係辦法，講到天光都未講完。好似重建居屋，好似骨灰龕位，好似六大產業，隨便一個問題都可以洋洋灑灑寫下萬言書。
為咗節省篇幅，功夫茶唔再具體臚列各式各樣嘅問題嘞，淨係向即將揸莊打骰嘅新政府講一樣嘢：千祈千祈千祈，唔好唔好唔好，學似之前特衰政府咁懵丙！
老懵董有名你叫啦，呢個係懵丙一號，腳痛落台之後由曾蔭權接替，點不知佢居然成為懵丙二號。經過董建華八年之亂，再經過曾蔭權七年之癢，懵丙治港成績有口皆「悲」。所以咯喎，一句到尾，治港不能靠懵丙！
至於梁振英可以點做先至爭取到更多支持度，從而改善施政效率，呢家嘢真係要認真諗吓計喇！