政情：劉夢熊梁福元握手合照
一直「挺梁」嘅宗教界選委、政協委員劉夢熊尋日一早就去咗特首選舉投票會場投票，最矚目嘅係佢同早前一齊被捲入「鄉事派流浮山飯局」風波嘅鄉事選委梁福元等鄉紳齊齊到場，令到在場的記者打個突。
唔單只咁，劉夢熊仲要同佢哋握手兼合照，佢之後仲話︰「足以證明係無黑金政治啦！」莫非佢哋想「一照泯恩仇」，化解之前嘅種種誤會？
劉夢熊尋日朝早八點幾到達灣仔會展嘅投票會場，比原定投票時間早咗成個鐘，早到嘅仲包括梁福元在內嘅幾個元朗鄉事派選委，成為最早到場嘅先頭部隊。不過，可能太早到場冇乜嘢好做，期間劉夢熊就搵梁福元交談，之後仲拉埋幾個鄉事派選委齊齊合照。
之前佢哋先因為一個流浮山飯局風波搞到滿城風雨，依家終於可以排排企嚟個大合照，總算係個好開始。