政情：山頂票站星光熠熠

喺尋日嘅選舉委員會界別分組投票，最星光熠熠嘅票站一定係山頂德瑞學校。自由黨副主席周梁淑怡（莎姐）同夫婿周明權穿着厚厚嘅冬衣去投票。周明權話莎姐係以政協身份投票，而佢則屬於工程界，周明權認為揀選委嘅標準係睇吓候選人嘅理念是否符合自己嘅心意，同埋睇吓佢哋喺業界嘅往績與貢獻；而嗰啲臨近選舉至彈出嚟嘅候選人當然不予考慮啦。至於佢會支持邊位仁兄出任特首？周明權就話未有決定。
周梁淑怡與夫婿周明權拍拖嚟投票。（徐家浩攝）
周梁淑怡與夫婿周明權拍拖嚟投票。（徐家浩攝）

同樣來自工程界嘅仲有專資會會長胡曉明，佢好孝順咁攙扶住爸爸胡法光嚟投票。早年縱橫政商界嘅胡法光如今已經八十八歲，但睇嚟精神都仲好好，胡曉明話因為有份出席梁振英嘅造勢大會，挺梁係理所當然嘅，至於佢嘅爸爸則仍未決定支持邊位仁兄做特首。其他一雙一對咁嚟投票嘅仲有黃乾亨黃英豪父子，兩人前後腳咁喺票站出現。而馬會大董周永健伉儷就跟周松崗一樣，都係趁沙田馬場嘅國際賽事開始之前去投票。

胡法光（右）由胡曉明攙扶，去票站投票。
  • 胡法光（右）由胡曉明攙扶，去票站投票。

「Money18免費即秒股票報價網站」現推出8升級功能，財經資訊，實時實發！