政情：李梓敬影結婚相凍到病
近日成個政壇都將焦點集中喺特首選舉，但其實除此之外，唔少喜事都發生緊。好似自由黨青年團主席李梓敬（Dominic）咁，只有廿七歲嘅佢雖然年紀輕輕，已經決定同女友拉埋天窗，明年十二月就會喺迪士尼擺酒，前晚仲已經影咗第一輯結婚相添。
Dominic話，雖然距離婚禮仲有成年，不過由於佢哋兩公婆打算影四、五輯結婚相咁多，所以依家開始影已經唔算好快o架喇。佢又話，未來老婆好希望有個童話式婚禮，明年十二月二日會喺迪士尼筵開三十席，希望可以滿足到老婆夢想咁話喎，咁識冧人，難怪抱得美人歸啦。
前晚條街氣溫極低，Dominic同未婚妻喺刺骨嘅寒風下企足五、六個鐘頭，結果搞到病咗，聲都沙晒。不過Dominic就笑言，只要啲相影得靚，加上有個咁好嘅老婆，即使病都抵喎。聽佢咁講，天氣唔凍都毛管戙喇。