政情：旅議會新血王淑筠 冀助業界解困

做朱古力生意 有零售同市場經驗

據了解，今次選舉本來有五名候選人競逐四個理事職位，但後來有候選人退選，於是就變成等額選舉。Diana話，先前喺競選期間都覺得緊張，但喺過程中識咗好多朋友。咁嚟緊會有乜嘢意念去幫助業界？佢就話本身做朱古力生意，有零售同市場策略經驗，喺商會都認識到做唔同生意嘅商家，希望喺呢方面畀多啲意見旅議會。

作為旅議會新人，Diana亦期望可帶新思維入去，又話旅議會內有唔少業界前輩，大家唔怕擦出火花，最重要係透過溝通令大家意念融合，咁對業界先有裨益。

旅議會主席黃進達就話，理事等額選舉並唔罕見，又認為有更多新血加入旅議會係好事，可以將更多唔同嘅構思同意念帶入旅議會討論，可以集思廣益咁話。