中環出更：張燊悅持續進修拯救地球
前藝人張燊悅（Nicola）五年前淡出娛樂圈，下嫁家底豐厚嘅教育局政治助理楊哲安，仲一口氣生咗兩個寶貝女，幸福少奶奶嘅生活不知恨死幾多姊妹。不過，Nicola竟然感嘆師奶生活太乏味，唔甘心以後都過呢種生活，於是現正修讀環境管理碩士課程，目的係乜？一圓佢拯救地球嘅夢想囉！
「親愛的我」網站最近搵咗好多城中名人喺「名人的信」專區抒情憶童年及展望未來。有份寫信嘅Nicola，就透露細時夢想做醫生，經常幫洋娃娃睇病，直至有次見血即時暈低，從此夢想破滅。後來入讀港大法律系諗住做大狀，無奈搵唔到想做醫生嗰種熱誠。於是畢業後入咗娛樂圈，成為圈中才女。不過才女抱負高，堅持唱勵志歌曲，最終未被市場接受。
潘佩璆王國興感性留言
急流勇退做賢妻良母嘅日子已有四、五年，Nicola開始覺得沉悶、失落，年前毅然修讀環境管理碩士課程，希望一圓拯救地球嘅夢想。卓妮尋日搵過楊哲安，但佢正放假外遊，唔知係咪一家去旅行氹番愛妻呢？
除咗Nicola之外，工聯會立法會議員潘佩璆、王國興都感性留言。潘佩璆憶起四十五年前，位於何文田與土瓜灣之間嘅「鬼仔山」係佢返學必經之路，佢同細佬曾經捉咗幾隻小蝌蚪返去屋企魚缸養，點知後來蛻變成小蝦蟆，都幾搞笑。王國興就趁機鬧煲呔曾呼籲市民生夠三個，但連男士侍產假都唔畀，點叫小朋友親親爹哋呢？
卓妮