中環出更：蝶后愛環保闖北極探秘
三十幾度酷熱天氣，真係熱到人都癲，全球暖化嘅威力認真強大。被喻為新一代蝶后嘅港隊新星梁雅媛（Rachel）都話，要為環保出一分力！後生女坐言起行，Rachel今年就參加咗仁愛堂與野外動向合辦嘅北極考察之旅，下月三日跟住專家展開為期十七日嘅極地探險。
帶燈籠月餅作交流
年僅十六歲嘅Rachel，為咗今次旅程，要好大犧牲放棄參加香港國際公開游泳錦標賽，但佢話：「一生人可能得一次機會去北極」，去咗先至算喎！今次極地探險共有廿二人出發，期間仲撞正中秋節，Rachel話會帶埋燈籠、月餅、燈謎等，同當地原住民交流文化，仲會睇冰川嘅融化情況。
究竟呢個熱血女飛魚脫穎而出嘅秘訣係乜呢？Rachel話：「我喺深水埗嘅雪糕乳酪店擺放廢膠樽回收箱，仲寄信去體育學院院長，要求喺體院放置回收箱，叫同學仔做回收。」咁出心出力，難怪被選中。
尋日舉行活動啟程禮，極地探險專家李樂詩、平等機會委員會主席林煥光都到場打氣，李樂詩大讚一班後生仔女嘅體質同心理都好好，希望佢哋了解北極真實一面，返港後積極推動環保。未去過南、北極嘅林煥光就話，平時多數去具文化氣息或可供玩樂嘅地方旅行，極地探險要等到退休先諗喇。