車仔fans上「山」考牌 糖妹一Take Pass！
球愛敢死隊出動！體育版「優質雄性動物」接受號召，組成一支史無前例兵團，走訪娛樂圈及各界靚女，講吓佢哋對波的感受，當中有愛情、奇情、癡情……乜情都有，務求要你讀完之後愛到死為止！
成日都聽到班波友講「啲女人都唔識波架啦！」我哋「敢死隊」就好唔同意呢個講法，仲認為愈靚嘅女人就愈識波添！為咗證實呢點，每集《球愛敢死隊》都會邀請城中靚女，接受有關足球嘅文鬥同武鬥；第一集就請嚟「宅男女神」糖妹（黃山怡），佢除咗親身到車路士足球學校拜師學藝，仲要面對十條有關車路士嘅問答題，究竟糖妹能否過關呢？
本身就係車路士球迷嘅糖妹，細細個已經識踢波，今次就踩入車路士足球學校做個「超齡學生妹」學踢波，表現仲得到主教練、前香港足球先生山度士「畀Like」添！雖然呢間學校收生條件為四至十七歲小朋友，但「山Sir」眼見糖妹「骨格精奇」，有可能係萬中無一練波好材料，於是就「破格」收佢為徒，更親自「一對一」傳授足球秘技。
一小時特訓全面升呢
經過一小時特訓，糖妹完全「升呢」，而佢仲回憶起以往做「小學雞」時嘅足球歲月：「我讀小學時校內有個足球場，好多時都會同成班男同學一齊踢波，但係我技術差，次次都畀人屈做龍門，仲經常食波餅省中塊面！勁慘！不過，到咗中學轉到女校就冇再玩，反而改做球迷睇比賽。」
事隔多年再踢波，糖妹表現一點都唔失禮，更獲得「山Sir」大讚。呢位「超齡學生妹」好滿足咁話：「好開心嚟到呢個藍色、象徵車路士嘅球場踢波，之前踢足球都冇正式接受過訓練，今日『山Sir』教咗我控球同盤球基本功，令我獲益良多。不過，我學起嚟比較心急，因為自己性格係見到乜嘢都想快啲學識；加上今次嘅教練係『山Sir』，平日好少機會得到佢指點，當然想盡快喺佢身上吸收多啲足球精華啦！」
圖、文：司徒子文