政情：方健僑訪日玩App逃難
日本核輻射危機四散，愈來愈多港人撤離當地。無線科技商會會長方健僑（Ken）日前身在橫濱，經歷九級強烈震盪，目睹地鐵車站內嘅行人電梯猛烈搖晃，佢一度與其他同行團友失去聯絡，全靠iPhone手機內嘅「WhatsApp」程式，成功逃過一劫，日前返抵香港後仍猶有餘悸，行步路都覺得腳浮浮。
阿Ken早前參加咗貿發局協辦嘅交流團，考察東京電訊業，一行廿多人，考察完結後，佢就同幾名團友由東京坐鐵路去橫濱玩。就喺抵達橫濱車站一刻遇上地震，阿Ken匿埋月台一角避難，後來轉折入住當局安排嘅避難中心，當晚氣溫低至兩度，但只獲派發兩張紙皮禦寒，冷得佢騰騰震。
阿Ken多番致電香港入境處求助，但不得要領，惟有不斷用手機向身在日本嘅朋友及貿發局人員發短訊求助，最後以「車駁車」方式，由橫濱返回東京下榻嘅酒店，仲成功搵番失去聯絡嘅團友。經歷十四小時逃難，相信呢個經歷永世難忘。