政情：中策組民調偏私嘥公帑
中央政策組日前被踢爆秘密委託中大進行民調，疲勞轟炸式詢問市民廿多條問題，包括財爺鬍鬚曾應否為推出「史上最廢」預算案引咎下台？香港是否出現管治危機等？但係又唔肯公布調查結果同根據民意炒咗鬍鬚曾，浪費納稅人公帑同啲受訪者嘅寶貴時間。有政圈中人話，其實中策組問漏咗一條好重要嘅問題，就係佢哋嘅首席顧問劉兆佳應否下台！我哋就創作咗一份模擬中策組絕密問卷，詢問多條市民真係最關注嘅問題，供佳叔參考。
佳叔早前喺電視攝影機鏡頭前，言之鑿鑿話香港陷入「臨界點」，但之後死口唔認自己講過，中策組好應該問吓市民點解，建議答案選項包括：一．佢講「臨界點」嘅時候發緊夢、二．佢當時飲醉酒、三．佢患咗老人癡呆症、四．佢明明講過都唔算數。無論係邊個答案都好，佢都好應該立即引咎或因病自行辭職。
前中策組全職顧問練乙錚早前講過，特區政府屢次錯估民意，施政脫離民情，中策組作為幫政府收集民意嘅機構，好應該自行解散慳番啲公帑。就算唔立即解散，都應該盡快「正名」做「特區政策組」，以免令人誤會呢個超廢嘅特區部門係幫緊北京嘅中央政府做嘢。中策組無理由唔就呢兩個問題問吓市民意見。
中策組有問市民鬍鬚曾應唔應該下台，其實呢條問題一定要問清問楚，建議答案選項包括：一．好應該、二．非常應該、三．超應該、四．早幾年就應該。
示威問題好有「問題」
對於早前嘅反預算案示威衝突，中策組問市民家長係咪應該帶同未成年子女上街、以及警方發射胡椒噴霧前有冇先作警告。其實啲受訪市民根本唔喺現場，又點知警方事前有冇警告呢？呢條問題根本就好有問題。中策組不如問吓市民，啲家長帶同子女參加埋啲慶回歸同撐申亞集會，係咪教壞細路好過。
至於中策組問市民香港係咪出現管治危機，等於問自己阿媽係咪女人，如果冇危機嘅話，就根本唔使做呢次民調啦！講到尾佳叔都係立即下台，唔好再嘥公帑做埋呢啲問卷。