政情：唐唐熊抱六嬸隔開CY
兩名疑似特首候選人尋日喺城市大學冤家路窄，佢哋表現得避避忌忌，又企到離行離列，見到都戥佢哋尷尬。
政務司司長唐英年（唐唐）同行政會議召集人梁振英（CY）尋日齊齊出席城市大學「邵逸夫創意媒體中心」命名儀式，除咗佢兩位之外，兩位電視廣播有限公司副主席方逸華同梁乃鵬，同埋城大校長郭位都有出席。
CY係城大校董會主席，算係半個主人家，不過佢上台之後，即時閃埋一邊，點都唔肯企中間；另一邊唐唐又係咁，不斷嘗試將身邊嘅方逸華拉到中間位置，企圖拉遠自己同CY嘅距離，不過方逸華點都唔肯企中間，唐唐出動埋熊抱都拉唔郁佢。大家喺主禮台上擾攘咗一輪，真係失禮人。
本身係核專家嘅郭位近日解說日本嘅核電廠危機，深入淺出，佢尋日喺儀式後賣口乖，除咗多謝邵逸夫捐出一億畀城大之外，仲話覺得邵逸夫同方逸華兩公婆係「江山美人」，估唔到自己一把年紀仲可以見識方逸華嘅風采喎。咁識講嘢，捐錢嘅人心都甜晒喇。