絲絲講場：26歲仔搞買賣App 8億唔賣變39億

四年前，有人提出以1億美元收購專賣二手貨品應用程式Carousell，當時廿六歲嘅公司共同創辦人兼行政總裁郭修瑞有志將公司發大嚟搞，堅決唔賣盤！

擬擴充印尼菲律賓業務

依家佢三十歲，公司市值飆至5億美元（約39億港元），證明佢同埋另外兩位創辦人兼老友吳承翰及陳翊偉當時決定英明。公司早排仲攞到新增8,500萬美元融資，計劃擴充印尼、菲律賓及台灣業務添。

問起郭修瑞當年做咩唔攞錢？佢話係學Facebook創辦人朱克伯格，人家早年都推過唔少收購Offer。仲話成日有人嚟問價，佢同團隊會諗幾個問題：收購嘅公司掂唔掂？依家係咪最啱嘅Timing放手？同埋應唔應該繼續追夢？沉思完，暫時都係Not for Sale！

公司一二年於新加坡創立，同年推出Carousell應用程式，旗號「影相賣嘢、傾偈買嘢」。平台會因應不同市場而有當地特色，例如新加坡平台內置嘅Chat應用，好似「Can or not？」呢類Singlish（新加坡英語）溝通，亦難唔到佢哋。

余絲韻