絲絲講場：衍生主席：覓新品牌難過搵老婆
衍生集團（06893）有自己品牌同埋代理品牌雙線發展，主席彭少衍話嚟緊會淘汰一啲舊代理品牌，會喺日本、南韓同埋泰國等搵啲新品牌嚟做代理，不過彭生就話「難過搵老婆」！
佢解釋，依家集團有約10個代理品牌，當中約兩、三個合約即將到期，之後唔再續約，所以要物色新代理品牌，但係消費者口味不斷變，加上要搵一間歷史悠久又受歡迎嘅品牌唔係咁易，所以佢哋已經好畀心機去搵！
拍卡通片推廣中藥
彭生話未來重點放喺婦兒產品，包括第四季推出全新小兒草本系列，而針對女士美顏美體嘅副線品牌「衍美」將於九至十月推出。為咗應付多個品牌線推出，集團喺廣東省起緊新廠房，計劃於二○年投產，總投資6億人仔。
衍生呢幾年大力發展內地市場，為咗提升品牌知名度，佢哋投資咗千五萬製作咗套卡通片《草本家族》，等啲小朋友學識更多中藥知識，早排喺內地啟播，仲話市場反應好好，嚟緊希望有更多相關授權產品，好似有廠商接洽整玩具等，相信會為公司帶來收益。
佢期望未來內地業務比重三年內升到50%，依家只佔約兩成。
余絲韻